ब्रेकिंग

क्रीडा

लिओनेल मेस्सीसह अर्जेंटिना संघाचा भारत दौरा

Samruddhi Dhayagude
01 Apr 2025

नवी दिल्ली : लिओनेल मेस्सी अर्जेंटिना फुटबॉल संघासोबत भारतात येणार आहे. यावर्षी अर्जेंटिना संघ सामने खेळण्यासाठी येईल. मेस्सीने शेवटचा २०११ मध्ये भारत दौरा केला होता, आता १४ वर्षांनंतर हा फुटबॉल स्टार भारतात परत येत आहे.

भारतात फुटबॉलला प्रोत्साहन देण्यासाठी एचएसबीसी इंडियाने अर्जेंटिना फुटबॉल असोसिएशनसोबत करार केला आहे. या करारानुसार, अर्जेंटिना राष्ट्रीय फुटबॉल संघ भारतात एक मैत्रीपूर्ण सामना खेळेल.

एचएसबीसी इंडियाने एका निवेदनात म्हटले आहे की, अर्जेंटिना राष्ट्रीय फुटबॉल संघ ऑक्टोबर २०२५ मध्ये आंतरराष्ट्रीय प्रदर्शनीय सामन्यासाठी भारताचा दौरा करेल. या संघात स्टार खेळाडू लिओनेल मेस्सीचाही समावेश असेल.

करारानुसार, अर्जेंटिना संघ या वर्षी ऑक्टोबरमध्ये एक मैत्रीपूर्ण सामना खेळण्यासाठी भारतातील केरळ राज्यात येईल. हा सामना केरळमधील कोची येथे खेळला जाईल.लिओनेल मेस्सीने शेवटचा सप्टेंबर २०११ मध्ये भारताचा दौरा केला होता. त्यावेळी अर्जेंटिना फुटबॉल संघाने कोलकात्यातील सॉल्ट लेक स्टेडियमवर व्हेनेझुएला संघाविरुद्ध सामना खेळला होता. प्रेक्षकांनी खचाखच भरलेल्या स्टेडियममध्ये अर्जेंटिनाने १-० असा विजय मिळवला होता.